مسئولان محلی در ولایت نیمروز می‌گویند که روز (دوشنبه، ۲ میزان) یک مکتب در شهر زرنج این ولایت به بهره‌برداری رسید.
گل‌احمد حقانی، رئیس معارف نیمروز می‌گوید که این مکتب به ارزش سه میلیون ۸۰۰ هزار افغانی از سوی شرکت برادران نورزاد ساخته شده است.
رئیس معارف این ولایت می‌افزاید که این مکتب دارای ۸ صنف درسی و ۳ اتاق اداری می‌باشد و ظرفیت گنجایش ۵۰۰ دانش‌آموز را دارد.
بربنیاد گفته‌ی او، در ولایت نیمروز ۱۰۵ مکتب دولتی فعال است که بیش از ۸۰ هزار دانش‌آموز، سرگرم آموزش هستند.
