وزارت امور خارجه کشور در پیامی، از نهادهای بین‌المللی به ویژه کشور های میزبان خواسته است که قاچاق‌چیان انسان را دستگیر و به پنجهٔ قانون بسپارند.
به گزارش آژانس باختر؛ در پیام این وزارت آمده است: به تاریخ ۱۷ فبروری سال‌جاری، هژده تن از اتباع افغانستان که در یک واسطهٔ نقلیهٔ سربسته در سرک حلقوی شهر صوفیه، پایتخت بلغاریا برای سه روز گیرمانده بودند؛ در اثر گرسنگی، تشنگی و کمبود آکسیجن جان باختند و شمار دیگری از آنان به شفاخانهٔ مرکزی شهر منتقل شدند که وضعیت صحی آنان قناعت بخش است.
وزارت امور خارجهٔ امارت اسلامی افغانستان، مراتب تسلیت خویش را به خانواده‌های قربانیان این حادثهٔ غم‌انگیز ابراز کرده و یک‌بار دیگر از همه افغانان خواسته است که زندگی خویش را با انتخاب راه‌های غیرقانونی و قاچاقی مهاجرت به خطر نیاندازند.
به اساس گزارش آژانس باختر؛ این وزارت همچنان، از تمامی نهادهای بین‌المللی به ویژه کشورهای میزبان خواسته است که قاچاق‌چیان انسان را که همواره باعث جان باختن انسان‌ها می‌شوند، دستگیر کنند و به پنجهٔ قانون بسپارند.